bibliolucus

Un outro blogue en galego de Wordpress

Categoría: Exposicións (Page 1 of 3)

Conmemoración 180 aniversario

21 Novembro, 2022 / / 0 Comments

Durante toda esta semana pódese ver no vestíbulo do centro unha exposición na que se conmemora o 180 aniversario do noso centro e que está organizada arredor do título “180 anos da nosa historia: 1842-2022”.

Cartaz da conmemoración

Este é un dos actos previsto para a dita conmemoración pero non o único, pois o vindeiro mércores 30 de novembro, o catedrático de Xeografía e Historia, e antigo profesor do centro, Antonio Prado vai impartir unha conferencia titulada “Por que foi Lugo a sede do instituto”, e na que nos falará das causas polas que o noso centro é o Instituto Decano de Galiza, o primeiro instituto e un dos máis antigos de España.

Será ás 10’30 no Salon de Actos. Tamén a conferencia se emitirá en streaming, polo que se poderá seguir online e, igulamente, en breve, se subirá o vídeo á nosa canle de YouTube, para que permaneza para a posteridade.

Exposición- Tubos de descarga

31 Maio, 2022 / / 0 Comments

Dende o luns, pódese ver no vestíbulo do noso centro, unha exposición de tubos de descarga que pertencen á colección histórica do que demos en chamar “Museo Pedagóxico do IES Lucus Augusti“.

Estes tubos consisten en tubos pechados que conteñen, polo menos, dous electrodos, un ánodo e un cátodo, que cando reciben unha alta voltaxe emiten electróns e gas.

A exposición levouse a cabo por mor dunha relación interdisciplinar entre o Departamento dos Ciclos e mailo Departamento de Química. Aquí tedes un vídeo para podelo ver con detemento na casa.

Exposición de Plástica

3 Xuño, 2021 / / 0 Comments

Aquí temos, xa rematando o curso, unha exposición do Departamento de Plástica que presenta unha escolma dos principais traballos realizados por algúns dos seus alumnos. O tema era a representación de varias aves e paxaros, e podémolos ver co nome común e, tamén, co nome científico.

Vídeo de Xela Arias

25 Maio, 2021 / / 0 Comments

Velaí temos por fin o vídeo sobre a exposición con fondos da biblioteca que está ao dispor de tódolos usuarios da Biblioteca. É un vídeo curtiño porque por mor das medidas COVID non se puido empregar un espazo moi amplo. Pero, coidamos, que é suficiente para poder conmemorar a esta gran poetisa.

Xela Arias. Día das Letras Galegas 2021

8 de marzo: Mulleres que…

10 Marzo, 2020 / / 0 Comments

Este 8 de marzo, puidemos ver como as paredes e outros espazos se enchían de notas realizadas por alumnos e alumnas con mensaxes alusivas a esta conmemoración.

Foi unha acción coordinada co Club de Letras e serviu para facer notar, máis unha vez, que hai que ocupar os espazos porque se non, non se existe. O vídeo que se realizou e que podedes ver, amosa esa intervención.

Notas con pensamentos

Tamén se expón na Biblioteca unha mostra da obra da ilustradora Micaela Campanini Cáffaro, que presenta no IES Lucus Augusti a súa exposición “Mulleres que…“, unha iniciativa persoal para a visibilización das mulleres ao longo da historia. Tamén se completou cunha clase maxistral na que participou o alumnado no Salón de Actos. Aquí temos o vídeo de toda a actividade.

Día Internacional da Muller-2

20 Marzo, 2019 / / 0 Comments

Este é o vídeo que realizamos para espallar a exposición realizada no IES Lucus Augusti para conmemora-lo Día Internacional da Muller que tivemos durante varios días no vestíbulo.

Consta de varios libros, algúns cun globiño no que hai unha pequena sinopse do contido, e tamén os dous taboleiros verticais nos que se presentaron frases de persoeiros relevantes de varias materias como filosofía (Ortega e Gasset ou Schopenhauer), da relixión (san Paulo e santo Agostiño), da psicoloxía (como Sigmund Freud) e da política (Donald Trump). O nexo común de tódalas frases era a minusvaloración da capacidade da muller e do seu papel na sociedade.

Fronte a elas, aparecen fotos e nomes dunha escolma de mulleres galegas, cunha tarxeta na que debaixo do nome aparecen, moi sinteticamente, os seus feitos e éxitos. Dende cantantes como Sés ou Luz Casal, empresarias como Purificación García, intelectuais como Concepción Arenal ou Mª Xosé Queizán, deportistas como Vero Boquete ou Ana Peleteiro, profesionais ou científicas como Emma Ríos, Olimpia Valencia ou Begoña Vila.

Finalmente tamén quixemos incluír outro feixe de mulleres que tiveron un gran impacto social. Como Carmen Avendaño, pioneira da loita contra a drogadición e o narcotráfico en Galiza; ou Marcela e Elisa, tamén pioneiras a prol da liberdade sexual ou as irmás Touza Domínguez, denominadas as “Schindler galegas”.

Todo isto nos ten que servir para reflexionar sobre se de verdade, estamos tan sobrados de talento como para rexeitar as aportacións da metade da humanidade.

Exposición-O Fotógrafo de Mathausen

10 Xaneiro, 2019 / / 0 Comments

Hoxe xoves, ás 20’00 h inaugúrase no “Vello Cárcere” unha interesante exposición titulada “Boix. Fotógrafo de Mathausen“. Nela pódense ver moitas das fotografías deste fotógrafo nese campo de concentración. Na sesión inaugural, haberá unha conferencia e un “saúda” da alcaldesa.

Francesc Boix, foi un republicano catalán que durante a Guerra civil española, ao ser ocupada Cataluña polas tropas franquistas, fuxiu a Francia. Ao comezar a Segunda guerra mundial, formou parte do exército francés, e moi axiña foi capturado polas tropas alemás e enviado ao campo de concentración de Mathausen.

Alí, como era fotógrafo, realizou un feixe de fotografías que, co tempo, serviron para inculpar nos chamados “xuízos de Nuremberg” a moitos mandos nazis e para demostrar a existencia “real” dos campos de concentración. Como vedes, é unha figura ben interesante e seguro que a exposición é moi digna de ver e que non vos deixará indiferentes.

Laternenfest o Sankt Martinsumzug

22 Novembro, 2018 / / 0 Comments

O 11 de novembro é un día importante en moitas zonas de Alemaña, Suíza e Austria pois chega a celebración de tres eventos sinalados: O San Martiño (Sankt Martin), a próxima chegada do Nadal e o inicio do Entroido (Fasching/Karneval), que empeza o día 11 do 11 as 11:11hrs.

Neste día organízase un desfile polas rúas de cidades e vilas (Laternenumzug) no que rapaces e rapazas levan os seus farois, normalmente feitos manualmente por eles mesmos, e cantan cancións típicas desta festa: “Laterne, Laterne, Sonne, Mond und Sterne”, “ Ich gehe mit meiner Laterne und meine Laterne mit mir”.

O alumnado de alemán de 1ºESO A contribúe á celebración deste día no IES Lucus Augusti elaborando os seus propios faroliños dos que vos deixamos unha pequena mostra.

Retallos. Exposición fotográfica.

20 Abril, 2018 / / 0 Comments

Hoxe presentamos o vídeo da exposición fotográfica que titulamos como “Retallos“, e que se enmarca dentro dos actos conmemorativos do 175 aniversario.

Desta volta, pódense ver fotografías de tempos pasados onde cátedros levaban de excursión aos alumnos ou onde celebrábanse derbis futbolísticos “alumnos contra profes“.

Aprender a pensar…na Biblioteca escolar

10 Abril, 2018 / / 0 Comments

Encabezamos esta nota co lema escollido, este ano, na rede de Bibliotecas Escolares para que sirva de motivo durante todo o curso.

Próxima xa a exposición que sobre o lema deste curso, presentamos estes libros como avance.

Son libros divulgativos nos que se repasan as teorías filosóficas máis importantes da historia (existencialismo, racionalismo…), aparecen os autores máis relevantes (Descartes, Platón, Kant…) e nos que aparecen preguntas  que, en ocasións, son de difícil resposta: existen diferentes tipos de verdad?

En breve, presentaremos o vídeo con toda a exposición.

« Older posts

© 2023 bibliolucus

Theme by Anders Noren — Up ↑

error

Gústache o blogue? Corre a voz