bibliolucus

Un outro blogue en galego de Wordpress

Etiqueta: conmemoracións (Páxina 1 de 2)

Exposición “XEAS: Mulleres que estudan a Terra”

4 Febreiro, 2025 / / 0 comentarios

Por iniciativa do Club de Ciencias e do Equipo de Dinamización Lingüística exponse no vestíbulo do noso Instituto a mostra itinerante XEAS: Mulleres que estudan a Terra. co gallo da conmemoración do Día da Muller e da Nena na Ciencia o vindeiro 11 de febreiro. A exposición consta de sete paneis con textos de Rosa María
Mateos e Ana Ruiz Constán, do Instituto Xeolóxico e Mineiro de España
(IGME-CSIC), ilustracións de Nívola Uyá e tradución ao galego de Irene Pérez
Cáceres.
A mostra chegou a nós a través da Asociación de Ensinantes de Ciencias de
Galicia (ENCIGA), copropietaria da mesma, xunto coa sección galega da
Asociación Española para a Ensinanza das Ciencias da Terra (AEPECTGalicia).

O percorrido pola exposición permíte achegarnos a diferentes disciplinas das
Ciencias da Terra a través das aportacións de doce xeólogas de épocas,
contextos históricos e nacionalidades diferentes que, malia os atrancos cos
que se atoparon, deixaron unha forte pegada no coñecemento científico.
Algunhas foron, ademais, mulleres cunha gran conciencia social e compromiso
político. Outras implicáronse notablemente na transmisión do coñecemento
científico, especialmente a outras mulleres.

A mostra pretende ser un xusto recoñecemento ao traballo de todas elas e
unha ventá aberta para que o noso alumnado as coñeza e siga traballando na
visibilización do papel que xogou e xoga a muller na Ciencia.

A exposición permanecerá no centro ata o venres 14 de febreiro.

23 de febreiro-Día de Rosalía

25 Febreiro, 2023 / / 0 comentarios

Chegou o 23. Como tódolos anos, a AELG (Asociación de Escritores e Escritoras en Lingua Galega), encarga a unha figura sobranceira da cultura a realización do manifesto que será lido no acto central do Día de Rosalía de Castro, o sábado 25 de febreiro no Panteón de Galegos Ilustres, en Santiago de Compostela.

Este ano Carme Adán foi a persoa escollida para a redacción do Manifesto da AELG que tamén será lido en todos os actos promovidos pola AELG, así como nos organizados por outras entidades que se sumen ás propostas que a entidade remite a concellos, asociacións e centros de ensino.

O lema escollido para este 2023 foi: #cumpriuseaxustiza, e o manifesto completo o podes descargar aquí.

No centro, levouse a cabo a lectura do manifesto, houbo a exposición de retratos realizada por rapaces da ESO e repartíronse cartaces como o que vén a continuación cunha imaxe de Rosalía e unha parte do menifesto. A seguir, pódelo ver todo na seguinte galería.

Conmemoración 180 aniversario

21 Novembro, 2022 / / 0 comentarios

Durante toda esta semana pódese ver no vestíbulo do centro unha exposición na que se conmemora o 180 aniversario do noso centro e que está organizada arredor do título “180 anos da nosa historia: 1842-2022”.

Cartaz da conmemoración

Este é un dos actos previsto para a dita conmemoración pero non o único, pois o vindeiro mércores 30 de novembro, o catedrático de Xeografía e Historia, e antigo profesor do centro, Antonio Prado vai impartir unha conferencia titulada “Por que foi Lugo a sede do instituto”, e na que nos falará das causas polas que o noso centro é o Instituto Decano de Galiza, o primeiro instituto e un dos máis antigos de España.

Será ás 10’30 no Salon de Actos. Tamén a conferencia se emitirá en streaming, polo que se poderá seguir online e, igulamente, en breve, se subirá o vídeo á nosa canle de YouTube, para que permaneza para a posteridade.

Día Internacional da Internet segura

8 Febreiro, 2022 / / 0 comentarios

O 8 de febreiro, celébrase o Día internacional da Internet Segura, baixo o lema “Xuntos por unha Internet mellor“.

8 de febreiro – Día Intenacional da Internet Segura

Este evento, segundo UNICEF, celébrase cada ano dende 1997, para darlle pulo, informar e educar nun uso responsábel, respectuoso, crítico e creativo da rede. Ademais, é un día para lembra-la importancia de protexe-los dereitos da infancia na Internet”.

En Europa, está promovido por un organismo da Comisión Europea, que é a rede INSAFE/INHOPE, e que se centra fundamentalmente na mocidade para potenciar un uso seguro e positivo das TIC.

Hoxe, máis que nunca, cómpre incidir neste tipo de ideas pois vemos como as redes sociais están a chegar cada vez máis á xente nova quen, na maior parte dos casos, carece da titorización necesaria, a información ou o control debido por parte dos pais. Día si e outro tamén, aparecen novas nas que a mocidade é protagonista de sucesos que teñen que ver co acceso temperán á pornografía, o uso das redes para facer/sofrer “bulling” ou, cada vez, é fomentada a adición ao xogo on-line.

Os dous recursos que veñen a seguir, son unha actividade ofrecida por e-vocación para realizar na clase co alumnado até 4ºESO e un vídeo creado pola propia UNICEF. Námbolos dous casos, o que se pretende é fomentar un debate necesario sobre como empregamos e como debemos empregar as rede. Para acceder ao documento de e-vocación, non tes máis que premer sobre a imaxe do cartaz anterior.

Día do Libro-Materiais

4 Maio, 2015 / / 0 comentarios

Xa temos aquí o material das actividades sobre o Día do Libro deste ano. Están tamén en formatos diversos para que cada quen escolla o que máis lle guste.

En primeiro lugar, sobre a “Exposición de Profesores-Autores” e, en segundo lugar, a outra “Exposición sobre a conmemoración dos 400 anos da segunda parte de “El Quijote”, na que se poñían en relación textos da obra a carón das esculturas de Suso de Marcos (a quen dende aquí agradecemos enormemente que nos permitira usar imaxes de parte da súa obra para  a exposición). En ámbolos dous casos, temos unha imaxe estática que ao premer nela se despregará un libro virtual para podela ver o contido de calquera das exposicións con máis vagar.

Poster-antonioCartel Día do Libro

Da segunda das exposicións tamén temos un vídeo, que é o que segue.

Finalmente, a Guía de Lecturas que editamos para ese día, con novidades que presetntamos para ese día, algunha das cales foi petición do alumando, e que se poden coller nos estantes da nosa Biblio.

Día do libro

 

Outubro: Mes da Biblioteca (V)

25 Outubro, 2013 / / 0 comentarios

Rematamos as notas desta semana de conmemoración do Día da Biblioteca Escolar coa nova Guía de Lecturas sobre lecturas científicas. Todos estes libros, e outros máis, podédelos atopar na entrada da Biblioteca, no expositor. Estamos certos de que son o suficientemente atractivos e que resolverán algunhas das dúbidas máis cotiás que temos sobre diversas situacións. Os títulos son rechamantes, non si?

Para ve-la guía, tan só hai que premer na maxe.

Outubro: Mes da Biblioteca (II)

22 Outubro, 2013 / / 0 comentarios

O vindeiro 24 deste mes, celébrase o DÍA DA BIBLIOTECA. Esta data foi creada en 1997 pola ASOCIACIÓN ESPAÑOLA DE AMIGOS DO LIBRO INFANTIL E XUVENIL, co patrocinio do Ministerio de Educación, Cultura e Deporte, coa finalidade de concienciar á nosa sociedade da importancia da lectura, especialmente entre os cativos e  a mocidade e para resaltar o gran labor que realizan os bibliotecarios e bibliotecarias.

No presente ano o cartel e o pregón son de Andrés Rábago (máis coñecido como “El Roto“, coñecido debuxante do xornal “El País”) e de Laura Gallego (tamén coñecida polas súas series de literatura fantástica) e os actos conmemorativos han se celebrar en Segovia. 

Aquí vos deixamos o cartel conmemorativo e, nunha imaxe, o texto que escribiu Laura Gallego para a dita conmemoración. 

“One Woman”

8 Marzo, 2013 / / 0 comentarios

Interesante iniciativa a da ONU-Mulleres, unha entidade da ONU para fomenta-la igualdade de xénero, que para conmemora-la data do 8 de marzo conseguiron o apoio de mulleres artistas de diversas nacionalidades de todo mundo para realizar unha canción titulada así: “One woman“. A canción pódese mercar a través de varias canles e os cartos conseguidos serán empregados para mellorar a súa vida. O custe é de só 0’70€.

Podes acceder á máis información, e escoitar a canción, ou mercala, na web de “One Woman“, premendo na imaxe.

10 de decembro-Conmemoración

18 Decembro, 2012 / / 0 comentarios

Remata xa a semana ampla, na que se tratou o tema dos Dereitos Humanos, que aínda colea nas derradeiras sesións de titoría antes das vacacións de Nadal.  Na nosa exposición, como xa se indicara, a carón das fotografías e dos comentarios realizados por autores relevantes como a periodista Maruja Torres, ou os escritores Juan José Millás ou Goitysolo, tamén aparecía polo seu interese o discurso de Gervasio Sánchez cando recibiu o premio Ortega e Gasset. E tamén, para gañar en “interactividade” colocouse un espazo para que, quen quixer, colocara os seus comentarios sobre dúas fotografías ou sobre o conxunto da exposición.

Agora, xa é hora tamén de ir recollendo os materiais e, por iso, como clausura, deixamos aquí as fotos dos paneis do vestíbulo onde se realizara, antes de deixalo todo libre para colocar as recomendacións de lectura para o Nadal.

 

« Entradas anteriores

© 2025 bibliolucus

Tema por Anders Noren — Arriba ↑

error

Gústache o blogue? Corre a voz