bibliolucus

Un outro blogue en galego de Wordpress

Páxina 3 de 51

Enquisa de fin de curso

A piques de chegármonos á fin do curso chega o momento de ir facendo balance. Moitas actividades foron as realizadas neste curso, mais para vos ofrecer, aínda, un mellor servizo, deseñamos unha sinxela enquisa para que, anonimamente, se queres, nos fagas chegar as túas suxestións e puntúes o realizado ata este momento.

Os usuarios son a parte máis importante de todo este proceso que comezou hai pouco tempo; e os usuarios deben colaborar, participar, aprender, suxerir e, mesmo, avaliar. Para poder facer isto último tan só debes premer na imaxe que está aí abaixo e cando saia o cuestionario -tardarás menos de dous minutos- ler os enunciados e picar na puntuación que che pareza mellor. A nós vainos servir para comezar o vindeiro curso, con máis folgos e máis ideas. No derradeiro apartado, podes engadir o comentario que che pareza:  o que che parece ben, o que é mellorable, ou mesmo, suxestións de compras para o vindeiro curso.

Ánimo e a participar. Grazas. E feliz verán..

Imaxe votar

Día do Libro II

Para o Día do Libro, o Departamento de Normalización Lingüística propuxera a realización dun concurso de realización de vídeos nos que se recomendase un libro, o que sería un booktrailer, que se lle chama en inglés. Aquí temos os resultados para que os xulguedes vós.

Neste vídeo tedes recollidos os vídeos gañadores cos nomes dos autores:

E a continuación, temos estoutro vídeo cos finalistas:

IV PREMIO DE ENSAIO FILOSÓFICO

En sesión celebrada no IES LUCUS AUGUSTI o 25/04/2023 reunido o xurado do IV Premio de Ensaio Filosófico composto por profesorado dos Departamentos de Filosofía e Educación Plástica, e a escritora e redactora da revista colaboradora “Hechos Mínimos”; despois de avaliar os traballos presentados, o xurado decide fallar os seguintes PREMIOS:

 MODALIDADE ENSAIO

PRIMEIRO PREMIO para PABLO PEDREIRA LÓPEZ, de 1º BACH C.

SEGUNDO PREMIO para CLOE CANTO SYLLÁ, de 2º BAC E.

TERCEIRO PREMIO para PAULA PIÑEIRO LAGE, de 2º BACH E.

MODALIDADE VIÑETA

PRIMEIRO PREMIO para MARTA RIVERA LÓPEZ, de 2º BACH B (viñeta nº 1)

Ademáis dos traballos premiados, menciónanse tamén nas consideracións fináis os traballos presentados por ANTÓN RODRÍGUEZ VÁZQUEZ de 2º BACH E e IAGO RAMOS SALGADO de 1º BACH E.

O ENSAIO de PABLO PEDREIRA LÓPEZ destacado co Primeiro Premio contén unha reflexión madura e ben articulada sobre o tema proposto da “paz despois da guerra”, cun texto de ideas precisas e sensibilidade na expresión, con capacidade para suxerir e continuar pensando a partir del, mérito que consideramos especialmente destacable.

A VIÑETA premiada de MARTA RIVERA LÓPEZ reflexa en breves trazos as ambiguidades e paradoxas do tema, facendo que unha cuestión complexa poida ser transmitida con medios sutís, deixando abertas posibles lecturas da imaxe.

Non queremos deixar de destacar os ensaios premiados de CLOE CANTO SYLLÁ (un texto de gran riqueza no manexo de referencias culturais) e PAULA PIÑEIRO LAGE (con texto cheo de matices na expresión das ideas). E con elas, os textos de ANTÓN RODRÍGUEZ VÁZQUEZ e IAGO RAMOS SALGADO, con cualidades que os fan ser meritorios concursantes deste premio. Noraboa a todas elas e eles.

A entrega dos premios terá lugar o día 5 de maio de 2023, ás 11:15 na Sala de Xuntas do IES Lucus Augusti.

Día do Libro

Como actividade para o Día do Libro, Victoria, a profesora de Plástica co seu alumnado artellou unha bonita actividade denominada BOOKface. O que se trataba de facer era ir á Biblioteca e escoller un libro para facer unha montaxe coa súa capa sobre a cara ou o corpo propio, procurando crear un efecto artístico.

O resultado o podemos ver nas imaxes do vestíbulo e neste vídeo montado a partir das súas fotografías. Está curiosón, non si?

Nós tamén temos historia, volume II

O pasado xoves 20 de abril, presentouse o libro: Nós tamén temos historia volume II, escrito polo profesor de Xeografía e Historia Gaspar Méndez Fuentes e o seu alumnado de 2º e 3º ESO do curso 2021/22. O acto celebrouse no salón de actos coa participación dos pais e familiares do alumnado e tamén acudiron as autoridades da Deputación que subvencionaron a súa edición e mailo editor.

Xa en cursos anteriores falaramos do primeiro volume e, desta volta, vai o segundo. A seguir, podedes ver algunhas imaxes do acto.

8 de marzo

Con motivo do 8 de marzo, no vestíbulo do centro podiamos ver unha exposición de fondos da nosa biblioteca. Tamén foi o lugar onde varias alumnas leron un manifesto sobre a relevancia dese día.

Aquí temos unha imaxes sobre o acto.

Construíndo moléculas en 3D

O alumnado do Club de Ciencia do IES Lucus Augusti construíu moléculas de diferentes substancias orgánicas, previamente elixidas de acordo cos seus intereses. Os aminoácidos L-fenilalanina e L-arginina, a cafeína e a glucosa, o ácido acético, o trinitrotolueno e os alcohois etoxietanol e etilenglicol foron algunhas das seleccionadas.

 A actividade desenvolveuse ao longo de varias sesións nas que, en primeiro lugar, houobo que procura-la información, elixie a substancia e analizar e debuxa-la molécula a construír. Unha vez realizado isto, pintáronse as bólas de porexpan necesarias para cada molécula de acordo co código de cores indicado (vermello o átomo de osíxeno, azul o de nitróxeno e deixouse en branco o hidróxeno). A seguir, preparáronse os garabullos de madeira para realiza-los enlaces e contruí-las moléculas.

Finalmente, elaboráronse os documentos coa información das diferentes substancias representadas e creáronse códigos QR vencellados á información de cada substancia, así como da cartela identificativa da mesma, e montaxe da exposición. Unha vez, realizado todo ese traballo, presentouse na exposición nas vitrinas da entrada do centro, tal como podemos ver estes días.

Aquí se pode ver un vídeo da exposición.

23 de febreiro-Día de Rosalía

Chegou o 23. Como tódolos anos, a AELG (Asociación de Escritores e Escritoras en Lingua Galega), encarga a unha figura sobranceira da cultura a realización do manifesto que será lido no acto central do Día de Rosalía de Castro, o sábado 25 de febreiro no Panteón de Galegos Ilustres, en Santiago de Compostela.

Este ano Carme Adán foi a persoa escollida para a redacción do Manifesto da AELG que tamén será lido en todos os actos promovidos pola AELG, así como nos organizados por outras entidades que se sumen ás propostas que a entidade remite a concellos, asociacións e centros de ensino.

O lema escollido para este 2023 foi: #cumpriuseaxustiza, e o manifesto completo o podes descargar aquí.

No centro, levouse a cabo a lectura do manifesto, houbo a exposición de retratos realizada por rapaces da ESO e repartíronse cartaces como o que vén a continuación cunha imaxe de Rosalía e unha parte do menifesto. A seguir, pódelo ver todo na seguinte galería.

Entroido 2023

Por fin, este ano, despois da pandemia de COVID-19, xa podemos disfrutar dun entroido normal e corrente. No centro, celebrarase o concurso de disfraces e hai no vestíbulo unha expsición de máscaras, libros e obxectos diversos relacionados co entroido e co carnaval de diversos sitios. Abofé que é ben curiosa.

Día de Rosalía

O vindeiro 23 de febreiro é cando se celebra o Día de Rosalía, a nosa poetisa nacional. Desta volta, os rapaces de Debuxo Artístico II elaboraron diversos traballos compostos por unha versión de retrato e un dos poemas rosalianos. Participaron o Equipo de Dinamización da Lingua Galega e o Equipo de Biblioteca.

Velaí podedes ve-lo vídeo (premede na imaxe) co resultado. Este vídeo será proxectado nas clases ese día e, ás 11’15, haberá un acto no vestíbulo do Instituto.

E a seguir, tedes aquí un Genially, realizado entre os Equipos de Dinamización Lingüística de varios CEIP da Coruña e outro de Ourense nos que podes pór a proba os teus coñecementos sobre Rosalía.

Preme aquí para velo Genially de Rosalía
« Entradas anteriores Entradas seguintes »

© 2024 bibliolucus

Tema por Anders NorenArriba ↑