Un outro blogue en galego de Wordpress

Etiqueta: premio

Premio musical para un alumno

Alédamos anunciar que un noso alumno que cursa 4ºESO, Gerald Vázquez Fernández, vén de gaña-lo concurso do “IX Certame Creativo“, organizado polo Conservatorio de Música e Danza da nosa cidade.

A peza que compuxo titúlase “Burbujas de nostalgia“, e podedes ve-lo vídeo no que interpreta a súa composición, premendo sobre a imaxe.

Gerald Vázquez Fernández en plena interpretación

Concurso de Narración breve, Coca Cola 2016

O pasado venres 27 de maio, na Cidade da Cultura en Santiago de Compostela celebrouse a entrega de premios a nivel autonómico da 56ª edición do Concurso de Narración Coca Cola. Nese acto unha alumna do noso centro, Sofía Bussieres López de 2ºESO, acadou o 2º posto. Dende aquí queremos darlle os nosos parabéns polo seu traballo. Aquí deixamos unha pequena galería coas fotos do acto.

 

Pero se queres ver máis fotos, preme na imaxe seguinte para ir á galería do centro.

IMG-20160527-WA0034

Alumno premiado

O alumno do noso Centro CARLOS LANZÓS LÓPEZ  (de 1ºBAC-F) vén de obter o 2º premio na II Edición do Premio de Ensaio Subversivo “Guillermo Domínguez”, que tódolos anos convoca o IES Xelmírez I de Santiago de Compostela. Tamén colaboran a Asociación Cultural  “Colectivo Xelmírez” e a Secretaría Xeral de Política lingüística. Premendo aquí, podedes ver a acta de resolución do premio.

cartaz-ensaio

Cartaz do II Premio de Ensaio Subversivo

Este premio está dirixido ao estudantado da Comunidade galega, que curse o segundo ciclo da ESO ou o Bacharelato, e no que se valoran ensaios de temática filosófica que promovan unha imaxinación crítica. O traballo polo que conseguiu o premio, leva por título “Ensaio sobre a sociedade, a feliciade e a personalidade“.

Dende aquí mandamos os nosos parabéns pola participación e o resultado acadado.

Unha antiga alumna: María López Sández

O vindeiro sábado, ás 12’15 h, na Libreria Biblos que está preto do noso centro haberá a presentación dun libro realizado por María López Sande, titulado “A forma das nubes” que, editado por Galaxia, conseguiu o último Premio de Narrativa Breve Repsol 2012. Non é a primeira vez que consegue un premio, senón que xa é unha escritora que xa no 2007 conseguira o Premio Ramón Piñeiro  de ensaio coa obra “Paisaxe e nación. A creación discursiva do territorio“.

É unha alegría enorme, sobretodo, por tratarse dunha ex-alumna do IES. En breve teremos un exemplar no andel de novidades para quen o poidades ler.

Domingo Villar e “A praia dos afogados”

Hoxe vén de coñecerse como esta obra –A praia dos afogados– de Domingo Villar, que moitos tedes lido e que se atopa na nosa biblioteca é unha das 7 obras finalistas do premio Dagger. Este é, seguramente, o premio máis afamado  a nivel internacional sobre a temática centrada na chamada novela negra.

Con esta nominación, que se resolverá a finais do mes de xullo, recoñécese o labor e a escrita deste autor en galego e mais tamén da súa tradutora ao inglés, Sonia Soto. Xa foi unha obra varias veces premiada (por exemplo en 2010, pola Federación de Libreiros de Galiza) e que tamén foi traducida ao castelán sendo tamén moi recoñecida.

Dende aquí desexámoslle sorte con este galardón tan importante.

© 2024 bibliolucus

Tema por Anders NorenArriba ↑

error

Gústache o blogue? Corre a voz