Un outro blogue en galego de Wordpress

Etiqueta: Galego (Page 1 of 2)

21 días en Galego e+

A comunidade galego-falante mira este martes cara o Lucus Augusti. O instituto acolleu a clausura do programa 21 Días en galego e +, un proxecto no que participan doce centros educativos e que busca estender o uso do galego máis alá das aulas. Durante o acto, un grupo de alumnos interpretou Terra, de Tanxugueiras.

A iniciativa tivo boa acollida en estudantes e profesores, di o profesor Vázquez Somoza, que destaca que nestes vinteún días detectáronse cambios nos hábitos lingüísticos. Remarca que, seguramente pola súa condición de centro marcadamente urbán, o castelán é a lingua dominante no centro. “Unha cousa é a lingua das clases e outra a lingua de relación e nun centro urbán como este o peso do galego era limitado”, explica.

Aquí podemos ve-la imaxe que serviu para decorar e ambientar o programa nas cancelas de entrada ao centro. Se queres ver máis da iniciativa, premendo aquí, accedes ao artigo que nos adicou o xornal El Progreso.

Exposición Cantigas de amor e de amigo

Estamos a ver estes días unha exposición titulada “Cantigas de amor e de amigo. As cantigas de Martín de Padrozelos“. É unha exposición didáctica itinerante que estará no noso centro entre o 1 e o 12 de febreiro; coincide por tanto, co Programa 21 días en Galego e+ e por iso o conectamos na derradeira imaxe.

Estrea cinematográfica de “A praia dos afogados”

O pasado día 9 estreouse comercialmente a película “A praia dos afogados” baseada na novela do mesmo título de Domingo Villar, que vén sendo a continuación da anterior e exitosa “Ollos de auga“, que varios grupos tiveron, e teñen, como obra de lectura recomendada na materia de Lingua Galega.

A película, que foi rodada en Vigo e arredores e que conta con gran parte do equipo técnico galego e coa maior parte tamén de actores galegos, está dirixida por Gerardo Herrero, guionista, director e productor de ampla carreira, cun guión creado polo propio novelista.

O protagonista é Leo Caldas, inspector de policía e que tamén participa nun programa radiofónico de atención cidadá, que ten que resolver o aparente suicidio dun mariñeiro pero no que a autopsia leva a sospeitar que, en realidade, é un asasinato.

Aquí temos o trailer da película para que sirva de aperitivo.

[vimeo 130748842 w=600 h=350]

A Praia Dos Afogados – TRAILER galego from Tornasol Films on Vimeo.

Día das Letras 2012- Valentín Paz Andrade

Despois de navegar un pouquiño na rede, realizamos unha escolma con materiais para traballar a figura de Valentín Paz Andrade, autor a quen se lle adica este ano o Día das Letras.

O CEIP Condesa de Fenosa propón este xogo de preguntas e respostas sobre o Día das Letras Galegas que traza un itinerario dende a súa xénese ata os nosos días. Dous xogadores poden poñer a proba os seus coñecementos competindo dunha maneira lúdica e didáctica. A xogar!
Webquest do IES de Fene sobre a figura, vida e obra de Valentín Paz Andrade, para a ESO. 
Ligazón directa ao artigo biográfico da Galipedia sobre de Valentín Paz Andrade.
A Coordinadora de ENDL ofrece este mapa conceptual en formato pdf, para poder facer una resumo rápido da súa relevancia como persoeiro fundamental da vida galega na súa época. Atende sobre todo ó seu labor como empresario e político.
Caderno de aula, en formato pdf, que inclúe biografía, bibliografía, escolma poética e actividades sobre a vida e a obra do autor. Autoría: rogosece

Liña do tempo sobre os feitos máis relevantes da vida de Valentín Paz Andrade, fornecida polo IES San Paio de Tui.
Outra webquest, neste caso dende o IES “Ribeira do Louro” d’O Porriño; para 2º ciclo da ESO e 1ºBAC.

_________________________________________

Con todo isto, xa hai material abondo para poder traballar a súa importante figura. Damos as grazas os centros e os seus profes por compartir todo isto  que ten unha enorme calidade. Que os disfrutedes.

Doodle do “Día das Letras”

Si podemos. Hai ocasións nas que un fracaso sabe a victoria e unha victoria a fracaso. Explicámonos. Hai poucos días, navegando por este oceáno que é a Internet víramos unha inciativa de Juan Estévez Pin, datada en febreiro, que nos chamou a atención.  Na web de actuable.es puxera unha petición para que o todo poderoso Google  adicara un “doodle” o día 17 para festexar o “Día das Letras”, e dar máis visibilidade á nosa lingua. Claro! Por que non? Isto fora, máis ou menos, o día 1 de maio. Xa levaba máis dun mes cando víramos tal iniciativa e asináramos a carta. Fumos o asinante 2.826, como se pode ver na captura de pantalla da nota anterior.

Comentamos a iniciativa entre compañeiros e na rede do PLAMBE porque o tempo urxía se se quería chegar ás 5.000 sinaturas necesarias para manda-la carta. Lembrade era o día 1 de maio. A comezos desta semana, 10 días máis tarde, a web de actuable.es  estivo medio parada ao ser absorbida por change.org, unha web semellante pero maior. Xuntouse todo e pasou o tempo que había para que a petición fora tida en conta pero, mentres tanto, a xente seguía a asinar. En a penas 7 días pasouse de  menos de 3.000 a máis de 7.000. É dicir, moitas persoas participaban deste proxecto e vían necesario este tipo de actuación.

Agora que xa pechou o prazo supéranse as 7.000 sinaturas. Máis que suficientes para podelo ter levado a cabo. Para pedir a Google que abra unha fiestra internacional ao galego. Para pedir, incluso,  que todos os seus programas poidan ser empregados en galego, en igualdade con outras linguas.

Foi mala sorte, pero habemos ser positivos. O vindeiro 17 de maio, estaremos alerta e contamos con todos vós para non sermos 7.000, senón moitos máis. Ánimo e “mil primaveras máis para a lingua“.

O “Día das Letras” en Google.

Hai xa uns días na web de actuable.es apareceu unha campaña, creada por Juan Estévez Pin, para recoller sinaturas para solicitar a Google que o 17 de maio, “Día das Letras Galegas“, estableza un “doodle” en conmemoración dese día adicado este ano a Valentín Paz Andrade. Non queda moito tempo, pero para participar tan só hai que premer na ligazón do final deste artigo que nos conducirá á folla web, e da-los nosos datos.

Coma quer que sexa que ese mesmo día 17 de maio é ademais o “Día da Internet“, este semella ser un xeito novidoso e chamativo para que a lingua galega teña unha maior presenza internacional.

Apúntaste? Para ir tan só tes que premer na seguinte imaxe.

Centenario de Celso Emilio Ferreiro

Cando se cumpren 100 anos do nacemento dun dos poetas máis relevantes da nosa literatura, Celso Emilio Ferreiro, aquí está a nosa particular homenaxe na que un feixe de alumnos participaron no programa “O son da nosa fala” da Cadena SER, levando a cabo unha lectura de poemas do poeta celanovés.

Coas fotos recollidas durante o acto, fixemos esta pequena montaxe, acompañada dos primeiros versos do poema “Longa noite de pedra“, na voz de Elena Jorreto. Nos créditos tendes unhas ligazóns por se queredes máis infomación.

[kml_flashembed publishmethod=”static” fversion=”8.0.0″ movie=”http://bibliolucus.blogaliza.org/files/2012/04/Celso-Emilio-Ferreiro1.swf” width=”500″ height=”400″ targetclass=”flashmovie”]

Get Adobe Flash player

[/kml_flashembed]

En galego tamén é bonito…

Nun dos renacidos medios de comunicación social en galego –praza.com, vén de aparecer unha entrevista con Xosé Vázquez Pintor. Autor pouco coñecido pero que, sen dúbida ningunha, paga a pena ler.

Representa, xunto con outros como Agustín Fernández Paz, unha xeración de autores que fixeron bandeira da lingua e son a honradez literaria personificada. Fronte a outros autores cheos de afouteza e vanidade, a voz -as verbas- de Vázquez Pintor sempre son un referente.

Se che interesa, podes ve-la entrevista enteira na seguinte ligazón.

Lois Pereiro-2

A través do “Caderno da lingua“, un dos blogues máis innovadores de Lingua Galega, vimos un video-documental sobre Lois Pereiro no que amigos, e persoas que compartiron con el moitas situacións, falan do seu valor como poeta e do seu percorrido vital. Como curiosidade, cabe engadir que tamén aparece Xosé Manuel Pereiro, irmán de Lois, actual Presidente do Xornalistas de Galicia, e periodista colaborador en “El País”. Tamén aparecen Antón Losada, periodista tamén coñecido, e Menchu Lamas e Antón Patiño -quizais os artistas galegos máis recoñecidos internacionalmente-, entre outros.

O vídeo titúlase “As armas da paixón“, dura uns 15 minutos e está realmente ben. É unha achega máis a este autor.

[kml_flashembed movie="http://www.youtube.com/v/qxFIs2z_dsw" width="500" height="400" wmode="transparent" /]

Correlingua 2011

Falta pouco xa para a “carreira a prol da lingua“, o Correlingua, que se está a celebrar tódolos anos por estas datas. Comezou o día 2 en Compostela e ata o día 13 percorrerá toda Galiza, animada polos berros da xente nova. O lema deste ano segue a idea dun verso de Uxío Novoneira, o autor conmemorado o ano pasado no “día das Letras Galegas”, que di así: “Galego: a forza do noso amor“.

Este ano o noso Centro tamén participará e o día 11, xuntarase con moitos outros aquí en Lugo para unha gran festa na que se espera contar durante estes días con 45.000 rapaces e rapazas que proclaman un futuro para a nosa lingua. Parabéns.

« Older posts

© 2022 bibliolucus

Theme by Anders NorenUp ↑

error

Gústache o blogue? Corre a voz