Un outro blogue en galego de Wordpress

Categoría: Novas (Page 1 of 4)

II PREMIO DE ENSAIO FILOSÓFICO

Xa temos a resolución do II Premio de Ensaio Filosófico. O pasado 30 de abril de 2021, reuniuse o xurado composto por profesorado dos Departamentos de Filosofía e Orientación, representación do alumnado e redactores da revista colaboradora “Hechos Mínimos” para dictaminar o resultado final que se pode ver na seguinte ligazón.

Olimpiada de Bioloxía

Hain uns días rematou a final autonómica da XVª Olimpiada de Bioloxía que, tradicionalmente, celebra e organiza a USC.

Desta volta, temos que celebar que un alumno do noso centro, Isaac Pazos Pérez, foi un dos vencedores, xunto cunha rapaza de Santiago e outro rapaz de Arzúa.

Os tres representarán a Galiza na final estatal que se ha celebrar no mes de maio en Bilbao. Dende aquí, mandamos parabéns polo éxito acadado e o esforzo realizado.

Foto: La Voz de Galicia

Exposición de pintura

O vindeiro venres, 8 de novembro ás 20 horas, inaugúrase unha exposición do artista da Mariña, Xoán Guerreiro. É un autor moi coñecido en Lugo e fóra de Lugo e ten unha alta cotización.

A exposición denomínase “Inherencias“, e fai referencia a todo aquilo que levamos connosco e que chega a ser propio de nós. O seu estilo é figurativo e vai dende obras case hiperrealistas até outras que teñen unha maior tendencia á xeometrización. Aparecen obras nas que se reflicten vistas da Mariña, de Lugo ou, como na tarxeta da inauguración, de Porto.

Exposición de Guerreiro

Aula de poesía

O Departamento de Filosofía, organiza para o vindeiro 22 de outubro, o recital “Poesía no camiño“, que se ha celebrar no noso centro, no Salón de actos de 11:45 a 13:25, especialmente adicado para o 1ºBAC de Humanidades de Ciencias Sociais.

A experiencia ten como obxectivo recuperar influencias coma a lírica provenzal e a mística sufí que chegaron as nosas terras polos Camiños, recuperar o ámbito mítico, esa xeografía soñada do país que imaxinou Uxío Novoneyra. Ademais de reactivar a temática xacobea trátase tamén de achegar ao alumnado ao feito poético en vivo.

O proxecto, organizado pola Fundación Uxío Novoneyra forma parte da programación O Teu Xacobeo” da Xunta de Galicia e ten como obxectivo recuperar a memoria das referencias e influencias da temática xacobea na poesía actual, seguindo a ruta do libro “Arrodeos e desvíos do Camiño de Santiago (Ámbito Mítico)”. 

Trátase dunha experiencia de escrita itinerante no que participan os poetas Grace Wells, Demián Rabilero, Tálata Rodríguez, Diego Horchowski, Fátima N. Delgado y María Luiza Fernandes da Silva, procedentes de Irlanda, Cuba, Colombia, Arxentina, Galicia e Brasil, respectivamente.

Presentación libros

O vindeiro xoves 11 de abril de 2019 ás 19:30 o Salón de actos do IES Lucus Augusti acollerá a presentación dos libros:

Golpistas e verdugos de 1936“: Como foron fusiladas autoridades civís, militares, policiais e administrativas sen que imaxinasen que ían ser executadas, porque esa posibilidade non formaba parte do seu mundo, nin da súa experiencia vital e política.

Historia de la guerra civil contada por dos hermanas“: Carlota e Fernanda García do Real son as autoras deste libro. Dúas irmás na Guerra civil, cada unha sorprendida nunha zona diferente. Ambas escribiron as súas experiencias do golpe de estado de xullo, da guerra de 1936-1939 e do impacto que causou nas súas vidas.

Participarán:

Ana Cabana Iglesia. Doutora en Historia Contemporánea

Lourenzo Fernández Prieto. Catedrático de Historia Contemporánea

Henrique Hervés Sayar. Profesor de Historia do IES Lucus Augusti

O último barco

Domingo Villar

Oito anos demorou Domingo Villar a terceira entrega das andainas do inspector Leo Caldas. “O último barco” son 800 páxinas de novela policial made in Galiza, unha “negra” de estrutura clásica que consegue manter a incertidume ata a derradeira liña. Gostara do debut con “Ollos de auga” e defraudome “A praia dos afogados” (sen mencionar a nefasta adaptación cinematográfica que fixeron dela) pero hai que recoñecer que este traballo, rumiando na pescuda dunha muller desaparecida en Moaña, está moi ben artellado. Lectura de entretenimento moi recomendable.
Para os/as incondicionais de Villar, que se contan por milleiros, imprescindible.

Cambio Climático

Interesante vídeo o que se puido ver hai un par de días na 1 da Televisión Española. O equipo de Metereoloxía da cadea participa estes días na Conferencia Internacional “Change The Change” que se está a celebrar en Donostia, e veñen de subir á rede un vídeo no que explican un dos posibles efectos do cambio climático se non atallamos a emisión dos gases de efecto invernadoiro.

Por se non o viches, telo aquí pola importancia que ten. É para pararse a pensalo. Non si?

Que opinas?

#Cuéntalo

En abril do 2018, despois de facerse pública a sentenza do xuízo da “manada”, a xornalista Cristina Fallarás lanzou a iniciativa “#cuéntalo“, un hashtag contra a violencia de xénero que pretendía visibilizar a través dos testimonios de mulleres vítimas de maltrato unha dramática realidade agochada tralo silenzo. Durante 14 días máis de 800.000 mulleres denunciaron na rede as violacións, acosos e agresións ás que foran sometidas.

Unha vez realizado o traballo de campo solicitaron a colaboración do Centro de Supercomputación de Barcelona para manexar os 13 gigabytes de información, con máis de 2 millóns de chíos que encherían 100 libros, de xeito que poideran converterse nun esquema sinxelo que achegara información respecto á situación da violencia de xénero sen perder cada historia individual e non sepultar os relatos persoais con cifras e estatísticas. O proceso para a construción do algoritmo a través dunha rede neuronal realizada a man foi complexo e rematou nunha páxina web impactante.

Unha colaboración entre periodismo social e tecnoloxía impresionante.

Ver web #Cuéntalo

Para saber máis Blogue #Cuéntalo

 

Premio extraordinario da ESO

Vén de publicarse a listaxe de alumnos e alumnas que conseguiron o Premio Extraordinario da ESO ao rendemento académico, e énchenos de orgullo  que un dos nosos alumnos estea entre eles. Trátase de Pedro Ferreiro Rega, a quen, dende aquí, queremos felicitar polo esforzo realizado e o éxito acadado.

Deixamos, tamén,  a ligazón á entrevista que lle fixeron no xornal “La Voz de Galicia” na edición de Lugo, de onde collimos esta fotografía na que posa subido á escaleira da nosa Bibloteca.

 

« Older posts

© 2021 bibliolucus

Theme by Anders NorenUp ↑

error

Gústache o blogue? Corre a voz