Aquí temos o vídeo coa conferencia da presentación do libro “A vida desmedida de Basilio Álvarez“, coa que Miguel Cabo Villaverde nos deleitara días atrás.
Autor: maghoi (Páxina 2 de 13)
Apenas onte, apareceu no xornal La Voz de Galicia, unha nova na que se informaba da entrega, a xeito de doazón, da biblioteca persoal de Arcadio López-Casanova á Biblioteca de Galicia. A doazón foi realizada pola súa viúva e ten máis de 2.000 exemplares.
Arcadio López-Casanova, como xa escribimos noutra ocasión, estudara o bacharelato no noso centro, de onde marchou a Santiago a estudar Filoloxía. A seguir, traballou un tempo no Colexio Fingoi até conseguir praza nun instituto de Valencia onde foi catedrático e, posteriormente, gañou unha praza como profesor titular na Universidade da mesma cidade.
Malia a distancia existente, nunca perdeu o contacto co país e seguiu a publicar en galego, e español, até se converter nunha figura importante da xeración que se denominou como “os Novísimos”.
Nunha das moitas veces que estivera por Lugo, conseguimos que dera unha conferencia e tivera unha xuntanza con alumnos de 2ºBAC, aló polo 2013 (nesta ligazón, podes ve-lo vídeo da xuntanza). O certo foi que non houbo que rogar demasiado porque sempre lle gustou ese contacto directo coa mocidade.
Dende aquí, aproveitamos a ocasión para lembralo cun agarimoso recordo.
O vindeiro xoves 8 de xuño, ás 19:00h, no salón de actos do IES Lucus Augusti será a presentación do libro: A vida desmedida de Basilio Álvarez. Basilio Álvarez, foi un importante persoeiro da vida galega e española nos momentos anteriores á Segunda República española, que se convertera no lider do agrarismo.
Participan no acto, organizado polo departamento de Xeografía e Historia e a Biblioteca, o autor Miguel Cabo Villaverde, catedrático de Historia na Universidade de Santiago de Compostela e autor do libro, e Henrique Hervés, profesor do centro que fará de presentador do autor e moderador do posterior coloquio.
A piques de chegármonos á fin do curso chega o momento de ir facendo balance. Moitas actividades foron as realizadas neste curso, mais para vos ofrecer, aínda, un mellor servizo, deseñamos unha sinxela enquisa para que, anonimamente, se queres, nos fagas chegar as túas suxestións e puntúes o realizado ata este momento.
Os usuarios son a parte máis importante de todo este proceso que comezou hai pouco tempo; e os usuarios deben colaborar, participar, aprender, suxerir e, mesmo, avaliar. Para poder facer isto último tan só debes premer na imaxe que está aí abaixo e cando saia o cuestionario -tardarás menos de dous minutos- ler os enunciados e picar na puntuación que che pareza mellor. A nós vainos servir para comezar o vindeiro curso, con máis folgos e máis ideas. No derradeiro apartado, podes engadir o comentario que che pareza: o que che parece ben, o que é mellorable, ou mesmo, suxestións de compras para o vindeiro curso.
Ánimo e a participar. Grazas. E feliz verán..
Para o Día do Libro, o Departamento de Normalización Lingüística propuxera a realización dun concurso de realización de vídeos nos que se recomendase un libro, o que sería un booktrailer, que se lle chama en inglés. Aquí temos os resultados para que os xulguedes vós.
Neste vídeo tedes recollidos os vídeos gañadores cos nomes dos autores:
E a continuación, temos estoutro vídeo cos finalistas:
En sesión celebrada no IES LUCUS AUGUSTI o 25/04/2023 reunido o xurado do IV Premio de Ensaio Filosófico composto por profesorado dos Departamentos de Filosofía e Educación Plástica, e a escritora e redactora da revista colaboradora “Hechos Mínimos”; despois de avaliar os traballos presentados, o xurado decide fallar os seguintes PREMIOS:
MODALIDADE ENSAIO
PRIMEIRO PREMIO para PABLO PEDREIRA LÓPEZ, de 1º BACH C.
SEGUNDO PREMIO para CLOE CANTO SYLLÁ, de 2º BAC E.
TERCEIRO PREMIO para PAULA PIÑEIRO LAGE, de 2º BACH E.
MODALIDADE VIÑETA
PRIMEIRO PREMIO para MARTA RIVERA LÓPEZ, de 2º BACH B (viñeta nº 1)
Ademáis dos traballos premiados, menciónanse tamén nas consideracións fináis os traballos presentados por ANTÓN RODRÍGUEZ VÁZQUEZ de 2º BACH E e IAGO RAMOS SALGADO de 1º BACH E.
O ENSAIO de PABLO PEDREIRA LÓPEZ destacado co Primeiro Premio contén unha reflexión madura e ben articulada sobre o tema proposto da “paz despois da guerra”, cun texto de ideas precisas e sensibilidade na expresión, con capacidade para suxerir e continuar pensando a partir del, mérito que consideramos especialmente destacable.
A VIÑETA premiada de MARTA RIVERA LÓPEZ reflexa en breves trazos as ambiguidades e paradoxas do tema, facendo que unha cuestión complexa poida ser transmitida con medios sutís, deixando abertas posibles lecturas da imaxe.
Non queremos deixar de destacar os ensaios premiados de CLOE CANTO SYLLÁ (un texto de gran riqueza no manexo de referencias culturais) e PAULA PIÑEIRO LAGE (con texto cheo de matices na expresión das ideas). E con elas, os textos de ANTÓN RODRÍGUEZ VÁZQUEZ e IAGO RAMOS SALGADO, con cualidades que os fan ser meritorios concursantes deste premio. Noraboa a todas elas e eles.
A entrega dos premios terá lugar o día 5 de maio de 2023, ás 11:15 na Sala de Xuntas do IES Lucus Augusti.
Como actividade para o Día do Libro, Victoria, a profesora de Plástica co seu alumnado artellou unha bonita actividade denominada BOOKface. O que se trataba de facer era ir á Biblioteca e escoller un libro para facer unha montaxe coa súa capa sobre a cara ou o corpo propio, procurando crear un efecto artístico.
O resultado o podemos ver nas imaxes do vestíbulo e neste vídeo montado a partir das súas fotografías. Está curiosón, non si?
O pasado xoves 20 de abril, presentouse o libro: Nós tamén temos historia volume II, escrito polo profesor de Xeografía e Historia Gaspar Méndez Fuentes e o seu alumnado de 2º e 3º ESO do curso 2021/22. O acto celebrouse no salón de actos coa participación dos pais e familiares do alumnado e tamén acudiron as autoridades da Deputación que subvencionaron a súa edición e mailo editor.
Xa en cursos anteriores falaramos do primeiro volume e, desta volta, vai o segundo. A seguir, podedes ver algunhas imaxes do acto.
Con motivo do 8 de marzo, no vestíbulo do centro podiamos ver unha exposición de fondos da nosa biblioteca. Tamén foi o lugar onde varias alumnas leron un manifesto sobre a relevancia dese día.
Aquí temos unha imaxes sobre o acto.
O alumnado do Club de Ciencia do IES Lucus Augusti construíu moléculas de diferentes substancias orgánicas, previamente elixidas de acordo cos seus intereses. Os aminoácidos L-fenilalanina e L-arginina, a cafeína e a glucosa, o ácido acético, o trinitrotolueno e os alcohois etoxietanol e etilenglicol foron algunhas das seleccionadas.
A actividade desenvolveuse ao longo de varias sesións nas que, en primeiro lugar, houobo que procura-la información, elixie a substancia e analizar e debuxa-la molécula a construír. Unha vez realizado isto, pintáronse as bólas de porexpan necesarias para cada molécula de acordo co código de cores indicado (vermello o átomo de osíxeno, azul o de nitróxeno e deixouse en branco o hidróxeno). A seguir, preparáronse os garabullos de madeira para realiza-los enlaces e contruí-las moléculas.
Finalmente, elaboráronse os documentos coa información das diferentes substancias representadas e creáronse códigos QR vencellados á información de cada substancia, así como da cartela identificativa da mesma, e montaxe da exposición. Unha vez, realizado todo ese traballo, presentouse na exposición nas vitrinas da entrada do centro, tal como podemos ver estes días.
Aquí se pode ver un vídeo da exposición.
Estamos aquí
O PESQUISADOR DO PAÍS
Blogue das Bibliotecas Escolares
As nosas novidades
A nosa videoteca
NOVEMBRO, MES DA CIENCIA EN GALEGO
Licencia do Blogue
Este obra está baixo unha licenza de Creative Commons Recoñecemento-NonComercial-CompartirIgual 4.0 Internacional.
Séguenos…
Comentarios recentes