Un outro blogue en galego de Wordpress

Autor: bibliolucus (Páxina 1 de 11)

25N (Lucus Augusti, 2023)

Día Internacional da Eliminación da violencia contra as mulleres. É algo máis que unha data no calendario. É unha necesidade, porque a pesar de haber sectores que negan a existencia desta problemática mundial, os datos son contundentes.

No IES Lucus Augusti organizouse unha actividade para sensibilizar sobre esta terrible realidade. No vídeo, podedes ver algúns datos para reflexionar, e as actividades feitas. Grazas a todas as persoas que participaron!

Laternenfest – Sankt Martinsumzug, Curso 2023-2024

Parece que o 11 de Novembro é unha data inspiradora. Como outros anos, o Departamento de Alemán organiza unha preciosa actividade para dar a coñecer a cultura alemá e as súas tradicións. Neste ano, o alumnado de 3º de ESO implicouse a fondo nos traballos presentados.

Para coñecer as orixes do Laternenfest e o Sankt Martinsumzug, así como o fabuloso traballo feito, podedes ver o seguinte vídeo. Parabéns!

Poppy Day

O 11 de Novembro é o Poppy Day ou Día do Recordo (Remembrance Day). Ás 11, do día 11, do mes 11… gárdase 1 minuto de silencio, coincidindo coa fin oficial da 1ª Guerra Mundial. Foi establecido en 1919 en lembranza de todas as vítimas da 1ª Guerra Mundial e, por extensión, de todos os conflitos bélicos. Celébrase nos países da Commonwealth. A papoula do recordo úsase desde 1921 e converteuse nun emblema, en referencia ao poema In Flanders Field. Foi escrito en 1915 polo tenente coronel médico McCrae, que participou na Segunda Batalla de Ypres. Inspirouse ao observar as papoulas que medraban entre as numerosas cruces dos caídos en guerra.

O Poppy Day foi tamén celebrado no noso centro, baixo a dirección do Departamento de Inglés. Neste vídeo podemos ver máis información e as actividades feitas. Parabéns a todas as persoas participantes!

DIE SCHULTÜTE: curso 2023-2024

Como todos os anos, o Departamento de Alemán organiza esta actividade para 1º de ESO, neste caso en 1º A e 1º B.  Unha “Schultüte” é un cucurucho cheo de doces e sorpresas para facer amable o inicio de curso. Esta é unha tradición en Alemaña que se remonta ao S. XIX, e que o Departamento de Alemán, con bo criterio, mantén viva. Non só suaviza o tránsito a unha nova etapa escolar, como é o inicio da educación secundaria e nun novo centro, senón que tamén supón un estímulo para iniciarse na aprendizaxe noutra lingua.

Ao tempo, pon a proba a creatividade do alumnado, que sen dúbida, este ano deixou o listón ben alto. Parabéns polo traballo feito!

Proxecto Competencial 1º e 3º de ESO. Curso 2022-2023

Este curso tivemos unha materia nova: Proxecto Competencial. Como o nome indica, preténdese desenvolver competencias múltiples a través de proxectos que estimulen a creatividade e a cooperación en traballos de equipo. Non hai nin apuntamentos nin exame, e preténdese que disfruten. Esperamos ter alcanzado algo ou moito do proposto, así como seguir mellorando nos sucesivos cursos.
A través dos seguintes vídeos podemos ver un resumo do feito e da excursión a Ponteceso en Xuño.

Excursión a Burgos

Organizado polo Departamento de Filosofía en colaboración co Departamento de Xeografía e Historia, fixemos unha excursión a Burgos co alumnado de 1º de Bacharelato. Visitamos Atapuerca, o Museo de Evolución de Burgos, o desfiladero de La Yecla e Covarrubias. Foi toda unha invitación para reflexionar sobre as diferentes dimensións do tempo: tempo antropolóxico, tempo xeolóxico e tempo histórico. O alumnado tivo unha actitude impecable en todo momento. Parabéns!. Dá gusto facer actividades con vós!

As mentiras científicas sobre as mulleres

As mentiras científicas sobre as mulleres

Paul Watzlawick, psicólogo coautor da “Teoría da comunicación humana” e un dos meus gurús, escribiu algo tan simple como: “A realidade non existe, é un constructo hipotético”. Esta afirmación axiomática é a pedra angular do relativismo, o todopoderoso e omniscente saber científico non é máis que unha quimera subiugante que, fundamentalmente dende o século XIX, coloniza a adquisición de coñecemento impoñendo unha ditadura sen precedentes na historia da humanidade.

As mentiras científicas sobre a muller” é unha reflexión alternativa á autocracia androcéntrica, creada perversamente sobre unha cultura hexemónica machista que despreza sistematicamente á muller e instrumentalízaa como obxecto de desexo e reprodución. Non é unha lectura de divertimento, trátase dun traballo de investigación que analiza o vergoñante tratamento que, dende o “incuestionable” paradigma positivista, estáse a facer coa muller. Dende a antropoloxía, a etología, a socioloxía, a menciña… Dauder e Sedeño van desenmascarando falsidades “científicas” que responden a intereses económicos e de perpetuación de roles de poder masculinos, tan daniños para o gineceo que resulta bochornosa a súa lectura. Coñecía superficialmente moitos datos: a inconsistencia do manual estatístico dos trastornos mentais e o seu recalcitrante tratamento das “patoloxías” sexuais e de xénero, o engano acerca das vacinas do VPH (Virus do Papiloma Humano), a vergoñosa implantación de métodos anticonceptivos baseados na abolición do ciclo menstrual… En fin, que se este libro non serve, non xa para sensibilizar senón para mobilizar a xente, apaga e imos.

Fractura

Quedei ancorado no libro “La vida en las ventanas“, non volvín a Andrés Neuman ata esta “Fractura” e laméntoo, sempre se cruzan lecturas entre desexos e vas abandonando promesas de reencontros que no meu caso quedan nunha listaxe virtual que xamais terei tempo para baleirala. Neuman é un grandísimo narrador e a súa última obra é un xogo entre a novela e o xornalismo reivindicativo, un manifesto antinuclear agochado na historia dun sobrevivinte de Hiroshima e os relatos en primeira persoa de 4 mulleres en 4 cidades que compartiron distintos momentos da súa vida, un trenzado sociocultural que xoga coas sutilezas da comunicación humana a través da linguaxe.

De cada libro quédame un recordo, polo menos un, se non me ocorre é que pasou pola miña vida como os centos de persoas coas que me cruzo cada día, obsérvoas pero non as inclúo nos meus recordos. De “Fractura” quedarame un concepto, a palabra á miña idade estou seguro de que se desvanecerá, o ” Kintsugi“, unha arte xaponesa que reconstrúe pezas rotas facendo visibles as súas gretas con láminas de ouro, unha metáfora da vida que se destrúe e recompón nunha sinusoide ineludible, algunhas persoas empéñanse en disimular as cachizas que conforman a súa historia, cando o verdadeiramente belo é mostralas como cegadoras fracturas. Eu polo menos son un home roto en mil pedazos, un kintsugi.

O muiñeiro ouveador

O muiñeiro Ouveador

En outubro de 2018 faleceu Arto Paasilinna, escritor finés do que se dixo fora o inventor do “humor negro ecolóxico”.

Eu estreneime na súa obra co “O muiñeiro ouveador“, maxistralmente traducida ao galego por Tomás González Ahola. Unha boísima elección porque a historia ben podería estar contextualizada na Galiza de mediados do século XX. Un conto fermoso no que a tolemia é cuestionada dun xeito intelixente ao confrontar os valores urbáns coa natureza, un alegato panteìsta cheo de graza e dramatismo. Moi recomendable.

Presentación libros

O vindeiro xoves 11 de abril de 2019 ás 19:30 o Salón de actos do IES Lucus Augusti acollerá a presentación dos libros:

Golpistas e verdugos de 1936“: Como foron fusiladas autoridades civís, militares, policiais e administrativas sen que imaxinasen que ían ser executadas, porque esa posibilidade non formaba parte do seu mundo, nin da súa experiencia vital e política.

Historia de la guerra civil contada por dos hermanas“: Carlota e Fernanda García do Real son as autoras deste libro. Dúas irmás na Guerra civil, cada unha sorprendida nunha zona diferente. Ambas escribiron as súas experiencias do golpe de estado de xullo, da guerra de 1936-1939 e do impacto que causou nas súas vidas.

Participarán:

Ana Cabana Iglesia. Doutora en Historia Contemporánea

Lourenzo Fernández Prieto. Catedrático de Historia Contemporánea

Henrique Hervés Sayar. Profesor de Historia do IES Lucus Augusti

« Entradas anteriores

© 2024 bibliolucus

Tema por Anders NorenArriba ↑

error

Gústache o blogue? Corre a voz